食完早餐搭三個幾鐘車去馬其頓(Macedonia)嘅奧赫里德(Ohrid)。奧赫里德同奧赫里德湖分別喺1979年同1980年被聯合國教科文組織列入世界文化同自然遺產。係馬其頓共和國唯一一個世界遺產。Ohrid意思就係「建在山上嘅小城」，果然喺奧赫里德哩半日就係不停上山、落山。
奧赫里德湖位於阿爾巴尼亞同馬其頓之間，係兩國共同擁有嘅。湖面面積有348平方公里，最深有294米，係歐洲最深嘅湖之一。
可惜我地冇時間遊湖，黎到奧赫里德首先食左午餐先。餐廳就喺聖索菲亞大教堂隔離。
鋪滿芝士嘅沙律
黎到湖區當然係食魚
食完就行過隔離睇聖索菲亞大教堂(Saint Sophia)。大教堂建於11世紀，係奧赫里德最具代表性嘅教堂。喺鄂圖曼佔領嘅時代被改為伊斯蘭寺，入面嘅濕壁畫俾d顏料掩蓋住，到第二次世界大戰之後，濕壁畫先重見天日。入面唔俾影相，不過d壁畫其實都已經好殘缺不全。
睇完聖索菲亞大教堂後就要開始行山喇
行到開始有d攰，就黎到哩個古羅馬劇場。
跟住繼續行上山，我地嘅目標，就係遠處山頭上嘅撒母耳城堡(Tsar Samuel's fortress)。撒母耳城堡係馬其頓現存中世紀最大嘅城堡遺址之一，建於976-1014年。當時撒母耳皇帝定都於奧赫里德，建造咗哩座要塞。
行到我喘晒氣，唯有扮影相休息吓。後面一班退休人士(團友)都未停低，我真係唔可以停💪。對於平日唔郁嘅我黎講，行哩段路堅攰。
終於到喇😵
上面風景好靚，攰都抵呀!不過真係唔好夏天黎。
睇完城堡行返落山途中見到哩座聖帕特雷莫修道院(Saint Pantelejmon)，附近仲有古代遺址，不過可惜我地都唔去，只能遠觀。
幻想一吓住喺度都唔錯
落咗山就要離開奧赫里德，開大約3個鐘車去首都斯科比亞或者叫史高比耶(Skopje)。喺休息站有哩隻小點心賣，2歐3個。領隊買左3個，俾咗個我地分黎試吓，都幾好味，有d似油炸鬼。
到咗斯科比亞，首先去德蘭修女紀念館(Memorial of Mother Teresa)。諾貝爾和平獎得主德蘭修女喺斯科比亞出生，不過其實佢同斯科比亞嘅關係唔深，佢一生嘅工作、服務，主要喺印度。
家居佈置係仿製品
頭巾就真係德蘭修女用過嘅
德蘭修女嘅親筆信
紀念館頂層有個小教堂
德蘭修女紀念館周圍
跟住就去馬其頓廣場(Square Macedonia)。廣場上有阿歷山大大帝雕像。阿歷山大大帝喺公元前336年成為馬其頓國王，在位期間不斷擴充國土。佢一生未嚐敗績，被認為係歷史上最成功嘅軍事統帥之一。
馬其頓廣場好大，有好多雕像，我地冇時間逐一了解。哩個雕像後面就係石橋同一個博物館。
石橋(Stone Bridge)連接咗斯科比亞嘅新城同舊城。
哩個噴泉係紀念阿歷山大大帝嘅媽媽奧林匹亞絲。阿歷山大大帝能夠喺20歲時繼位成為國王，相傳係因為奧林匹亞絲搵人暗殺自己嘅老公、阿歷山大嘅父王腓力二世。阿歷山大大帝喺外面東征西討時都有用書信同媽媽聯絡，可見佢地關係好好。
舊城區好多博物館
哩個雕像就係阿歷山大嘅父王腓力二世。
城牆
土耳其浴場
行完舊城就去食晚飯，係成個行程唯一一餐中餐。
味道都可以啦，喺歐洲食中餐不能要求咁多。
今晚住Holiday Inn，係咁多晚之中我唯一一間識嘅品牌。不過酒店都比較舊，個窗開咗之後閂唔返，要叫人黎幫我閂。咁多晚嘅酒店，全部都冇冷氣，一入房通常會有d焗，要開窗透透氣，通常臨瞓我就會閂窗。
房間有個小露台，望出去都幾靚。
話有好多枕頭可以揀，不過我有得瞓就得啦，冇搞咁多野。
巴爾幹半島 DAY 1+2 (盧比安娜、碧湖)
巴爾幹半島 DAY 3 (札格勒布、普箂維斯)
巴爾幹半島 DAY 4 (普箂維斯--十六湖國家公園、薩拉熱窩)
巴爾幹半島 DAY 5 (薩拉熱窩、莫斯塔爾)
巴爾幹半島 DAY 6 (杜邦力)
巴爾幹半島 DAY 7（高塔爾、巴杜華）
巴爾幹半島 DAY 8 (克魯亞、提拉那)
巴爾幹半島 DAY 10 (里拉修道院、索菲亞)
巴爾幹半島 DAY 11 (維勒托洛禾山城)
巴爾幹半島 DAY 12 (布加勒斯特、布拉索夫)
巴爾幹半島 DAY 13+14 (布拉索夫、錫納亞)
沒有留言:
張貼留言