My Blog: 巴爾幹半島 DAY 5 (薩拉熱窩、莫斯塔爾)

晨早食過早餐就出發喇。

波斯尼亞全名係波斯尼亞與黑塞哥維那(Bosnia and Herzegovina)簡稱波斯尼亞或者波黑。我覺得首都薩拉熱窩(Sarajevo)都幾多災多難。首先，第一次世界大戰嘅導火線就喺度發生。1914年6月28日，奧匈帝國嘅王儲斐迪南同佢妻子黎薩拉熱窩視察，就喺拉丁橋上被塞爾維亞青年普林西普所殺。哩件就係塞拉耶佛事件，引發咗第一次世界大戰。

到1992年，波斯尼亞為咗脫離南斯拉夫而獨立，又爆發波斯尼亞戰爭。薩拉熱窩被塞族軍隊圍城三年幾，死傷慘重。鄭秀文首「薩拉熱窩的羅密歐與茱麗葉」就係講緊當時一對不同種族、不同宗教信仰嘅情侶，喺逃離戰火時被射殺，女孩用盡最後一口氣爬到去男孩身邊，相擁而死，真有其事。當時一個戰地記者影咗佢地遺體嘅相，最後成為國際新聞。領隊仲話當時塞爾維亞嘅狙擊手好變態，佢地會射傷一d平民，等其他人去救受傷嘅人時，先再射死晒d人😡。

波斯尼亞境內嘅種族比較多樣化，有信伊斯蘭教嘅波斯尼亞人、信東正教嘅塞爾維亞人、信天主教嘅克羅地亞人同少量猶太人。1992年2月波斯尼亞進行獨立公投，由於塞爾維亞人抵制投票，所以投票結果有90%以上嘅票贊成獨立。波斯尼亞宣佈獨立，塞爾維亞非常不滿，從而觸發內戰。

第一站我地係去「希望隧道」。「希望隧道」係薩拉熱窩被圍城時而建嘅。隧道就喺一間好普通嘅民居內，外牆佈滿彈窿。

戰爭期間，薩拉熱窩被圍城。圖中紅色範圍就係塞軍控制，中間部份就係薩拉熱窩。相片中間偏右反光個位置係機場。當時北約因為人道理由，迫塞軍一定要開放機場。波斯尼亞人於是秘密地兵分兩路，一邊由機場開始掘隧道，一邊由哩間民房開始掘隧道。當時完全冇任何準確嘅探測，只係兩邊不停地用最原始嘅工具去掘，最後竟然兩邊成功連接到，形成哩條長800米嘅「希望隧道」。不過開放俾我地入去睇嘅只係好少一段，唔使一分鐘已經行返出黎。

當時嘅人就係靠哩條隧道運送傷兵、糧食、物資。就係靠哩條隧道，佢地捱過咗三年多嘅圍城戰。

相片下方就係當時用黎掘隧道嘅工具。

隧道出口

當時用嘅炮彈同地雷。

「希望隧道」內有個小博物館，有戰爭當時嘅影片播放。當我享受緊快樂童年時，同我差唔多年紀嘅當地導遊經歷緊戰爭。睇完嘅心情的確有d沉重。

之後我地去拉丁橋同舊城區。

一落車就見到市政廳，而家已經改為國家圖書館。

市政廳周圍

拉丁橋

拉丁橋對面有個博物館講返塞拉耶佛事件。

之後我地行去舊城區。哩個古蹟左邊其實就一間好現代化嘅酒店，企喺中間，一邊新一邊舊，感覺好特別。

舊城區內哩條分界線分開咗以前薩拉熱窩一邊係奧匈嘅勢力範圍，一邊係鄂圖曼嘅勢力範圍。

跟住去咗猶太博物館。

鄂圖曼嘅勢力範圍哩邊有個土耳其市集。

仲有清真寺

自由活動時間，我暫時做咗領隊，帶咗十幾個團友去咗奧匈嘅勢力範圍果邊。好彩我一早做足功課，領隊唔帶我地去，我唯有自己去。

哩個係波斯尼亞最大嘅天主教堂--耶穌聖心座堂(Sacred Heart Cathedral)，建於1884-1889年間。

若望保祿二世像，佢係第一個參拜東正教堂嘅天主教皇。

地下有d紅油，係紀念內戰時被射殺嘅人民，叫「薩拉熱窩玫瑰」。

行多陣就見到薩拉熱窩最大嘅東正教堂--聖母聖誕主教座堂(Saborna Crkva Rodenja Presvete Bogorodice)，教堂建於1863-1868年間。

跟住就行返去土耳其區，因為午餐餐廳就喺果邊。

去餐廳前仲去埋西比茲噴泉(Sebilj)，充滿伊斯蘭風味。

午餐餐廳

類似春卷，不過冇咁脆，都幾好食。

主菜都幾特別，用一片片好爽嘅薯仔，一層一層咁鋪上去，中間有d肉碎。旁邊白色嘅係yogurt。

甜品係蘋果，不過食落個味道好似煲完梨湯之後嘅梨。

食完午餐就去返市政廳果邊搭車去莫斯塔爾。

我覺得薩拉熱窩好靚，了解咗佢嘅歷史背景之後覺得佢多咗份淒美。一個舊城區內，有清真寺、有天主教堂、有東正教堂、有猶太教堂。凸顯咗佢嘅多樣性、複雜性。

好多屋仲留有戰火痕跡。

搭車去莫斯塔爾(Mostar)途中嘅風景。

喺波斯尼亞真係成日見到墳場，可能因為內戰時，死咗20萬人。

搭咗兩個幾鐘頭車，就到咗莫斯塔爾。莫斯塔爾喺1992-1995年嘅內戰中，都不能倖免。仍然見到好多戰爭嘅痕跡。

當大家掛住影哩間屋時，有個團友就係掛住影相，個斜揹袋一時推咗去身後，咁就俾人偷咗千幾歐羅同護照。領隊安頓好我地之後就同當地導遊陪個團友去報警。個團友就慘喇，因為我地差唔多日日要過關去唔同國家，佢冇咗護照所以一定唔可以繼續行程。而莫斯塔爾冇中國領事館，佢聽日要自己搭2,3個鐘頭車去薩拉熱窩搵中國領事館。領隊雖然唔可以同佢一齊去薩拉熱窩，但原來背後都幫佢做咗好多野。首先，領隊幫佢買咗張電話卡，方便佢聯絡。跟住幫佢打電話去中國領事館，原來做大使都幾嘆，領事館嘅辦公時間係逢星期二同四，上午9時至上午11時，即係一星期只有4小時辦公。不過中國大使應承聽日星期五，都會特登為咗個團友返大使館幫佢搞文件。領隊又即刻聯絡旅行社，叫公司e-mail返團友護照嘅資料過黎俾大使。團友出境嘅批文，就星期五即日已經出到，理論上可以即時返香港。不過大使館幫佢搵嘅機票太貴，要二萬幾。於是領隊又幫佢聯絡旅行社嘅機票部，搵到張一萬四千幾嘅機票，但要等多兩日先走得。佢真係超慘，冇咗之後嘅行程，仲要使多咁多錢先返到香港。哩件事之後，我好似有神經病咁，一日睇十幾次自己個袋，睇吓有冇唔見野。所有陌生人望我一眼，即刻當人係賊。又即刻影低自己嘅護照，touch wood有咩事上黎都好似方便d。

好，睇返莫斯塔爾。

老橋附近嘅餐廳可以食水煙。

最出名嘅就係條老橋(old bridge/Stari Most)。老橋係鄂圖曼帝國喺1557年下令興建，用9年時間建成，取代原本嘅木橋。但1993年嘅內戰，老橋慘遭摧毀。喺聯合國贊助下，1999年開始重建哩座橋，佢地盡量用返以前嘅材料、技術去重建，為咗更貼近原來嘅樣貌，甚至搵埋土耳其嘅公司幫忙。到2004年完工，正式重新開放。2005年，聯合國教科文組織將莫斯塔爾老橋同附近嘅舊城區列入世界文化遺產。