My Blog: 巴爾幹半島 DAY 4 (普箂維斯--十六湖國家公園、薩拉熱窩)

一早起身，發現一個電視台播大陸卡通，仲要係普通話配音。

落餐廳食早餐。見到我攞咁少野食，就知酒店早餐唔多啱我食。

食完早餐仲有時間，出去酒店外面行吓。又係咁大霧，實在好擔心一陣去睇十六湖會唔會受影響。其實一早出去，大約6、7度，著住厚褸都覺得凍架。

好彩去到十六湖，D霧又散晒喇。其實十六湖國家公園個真名叫「普利特維采湖群國家公園」(Plitvice Lakes National Park)。因為公園主要由十六個湖組成(上湖區12個、下湖區4個)，所以先會被叫做十六湖。公園喺1949年成立，係東南歐歷史最悠久嘅國家公園。公園內主要係「喀斯特地形」，有好多高低落差唔同嘅湖泊、洞穴、瀑布。而且水中含有大量礦物質同化學元素，加上零污染，令湖水又綠又清，難怪被譽為「歐洲九寨溝」。1979年，十六湖國家公園被列入聯合國教科文組織嘅世界自然遺產。

由於跟團時間有限，我地只行下湖區。

湖裏面好多鱒魚，成個trip都食左幾次。

哩條S形棧道都好經典，去過十六湖嘅人都一定行過，我地一陣都會行落去。

哩條梯就係行落棧道，其實都幾難行，梯級好滑，尾段仲好黑，導遊要用手機幫我地照明。

有幾個老人家都喺度跣低咗，好彩冇事。

一自拍個背景就搞成咁😭

其實好想做哩隻鴨😆

行完十六湖就搭車去食午餐

主菜食烤豬，都唔錯，最緊要係唔鞋。

甜品幾好食，味道好似冬甩。

食完午餐就要開始長車程。要坐6個幾鐘頭車由普箂維斯去波斯尼亞首都薩拉熱窩。

今次過關就喺好似香港D行車隧道嘅收費亭度排隊，隔離就真係馬路，有車行嘅。一出咗克羅地亞境，行前兩步喺波斯尼亞個亭度入境。我懷疑因為我地旅遊巴多人，所以先要落車過關，我見其他私家車，都冇人落車嘅。

要自己落車過關，咁多日以黎只係試過兩次。其他都係導遊收我地護照攞去俾關員給印(有時甚至印都唔給)，或者D關員自己上車收護照。領隊話通常收護照入房仔唔知搞乜果D關卡，多數都要收錢(通常係幾歐羅)。咁多日以黎，差唔多日日都要過關，通常係司機打頭陣，睇下咩環境先。有時會見司機走返上車攞水、攞飲品俾D關員，佢本護照順便夾埋錢。咁我地就可以順順利利過關。成個行程過關都好快，我都覺得好彩。我見有人話真係試過等幾個鐘。我地半個鐘之內都一定過到關。

今晚就住Hotel Sarajevo。一到酒店放低行李就去食自助晚餐。款式唔多，但幾好食。