食完早餐就要搭4個幾鐘頭車去阿爾巴尼亞(Albania)嘅克魯亞(Kruja)。途中見到黑山哩個好出名嘅聖斯特凡島，佢出名在島上係間超貴酒店，領隊話住一晚要過萬港幣，如果唔係住入面就唔准入島。由於我喺行緊山路嘅旅遊巴上影，真係冇辦法影得好。
終於去到阿爾巴尼亞，見到d街道、建築物，明顯比之前幾個國家窮。我初時好奇怪點解星晨會搵阿爾巴尼亞嘅旅遊公司安排行程，可能係因為平。有一個婆婆團友俾咗d舊衫個導遊，導遊又照收喎，唔通真係咁窮??
去到克魯亞第一時間食咗午餐先。
主菜係羊
不過我唔食羊，所以轉咗雞。
食完就影吓間餐廳，環境好靚。
餐廳隔離就係克魯亞城堡(Kruja Castle)，係12世紀時十字軍東征嘅城堡，而家就變成紀念民族英雄斯坎德培嘅博物館(National Museum George Kastrioti Skanderbeg)。
一入到博物館就見到斯坎德培同佢d將領嘅雕像。
斯坎德培(Skanderbeg)生於克魯亞嘅一個貴族家庭，佢爸爸反抗鄂圖曼失敗，於是要交出4個仔俾鄂圖曼做人質，斯坎德培就係其中之一。佢後來被迫改信伊斯蘭教，又接受鄂圖曼嘅軍事訓練，成為一位統帥。由於斯坎德培驍勇善戰，深得蘇丹嘅信任，將佢任命為5000騎兵嘅將軍。但其實斯坎德培一直偷偷地同基督教國家保持聯繫，想搵機會反抗。1443年，佢終於搵到機會，利用一封假書信呃到守衛開城門，收復克魯亞。之後佢公開放棄伊斯蘭教，皈依天主教。期後25年，鄂圖曼3次圍攻克魯亞，但有斯坎德培喺度，鄂圖曼都未能成功。到斯坎德培死後，鄂圖曼先再次佔據克魯亞。
壁畫就係講緊佢成為人質到收復返克魯亞嘅故事。
哩個係斯坎德培底下唯一嘅女將領。
斯坎德培用雙頭鷹做佢嘅標誌，而家阿爾巴尼亞國旗都係用雙頭鷹。
斯坎德培
斯坎德培博物館有個平台望返落山，好靚。
我好鍾意克魯亞
博物館嘅外貌
博物館行出去就係一個老市集，賣好多傳統手工藝品。
市集行到盡頭望返城堡都好靚。
我地喺哩間酒店附近等架小巴上黎接我地返旅遊巴停車場。由於克魯亞係個山城，大旅遊巴上唔到城堡哩邊，要轉搭小巴。
離開克魯亞，坐多一個鐘車就去到阿爾巴尼亞首都提拉那(Tirana)。喺提拉那嘅唯一景點就係斯坎德培廣場。就係一個好大嘅廣場，周圍有好多建築物。
歌劇院
國家歷史博物館
斯坎德培像，隔離有埃塞姆貝清真寺(Et Hem Bey Mosque)
廣場好似冇乜特別，好共產feel囉。睇完廣場就返酒店，今晚住哩間Hotel Doro City。超舊，不過好在喺市中心，行2,3分鐘就有個shopping mall。
企缸好細，喺入面沖個涼一定會撞到門或牆😓。
電視有雪花，好耐冇見過😨。
不過酒店晚餐幾好食，今晚係食set dinner。今晚導遊同司機冇同我地食飯，佢地係阿爾巴尼亞人，所以一到酒店都急不及待返屋企。司機已經兩個月冇返過屋企，公司要佢一團接一團(當然中間都有假嘅，不過喺其他國家放假，冇得返屋企)，遊遍歐洲返黎屋企一日，聽日又要出發去第二個國家喇。
晚餐期間仲有民族舞睇
最後老師抱住個b，同埋團友都跳埋一份。
食完飯同d團友去咗shopping mall行吓。
領隊話有警察嘅地方即係好多賊
巴爾幹半島 DAY 1+2 (盧比安娜、碧湖)
巴爾幹半島 DAY 3 (札格勒布、普箂維斯)
巴爾幹半島 DAY 4 (普箂維斯--十六湖國家公園、薩拉熱窩)
巴爾幹半島 DAY 5 (薩拉熱窩、莫斯塔爾)
巴爾幹半島 DAY 6 (杜邦力)
巴爾幹半島 DAY 7（高塔爾、巴杜華）
巴爾幹半島 DAY 9 (奧赫里德、斯科比亞)
巴爾幹半島 DAY 10 (里拉修道院、索菲亞)
巴爾幹半島 DAY 11 (維勒托洛禾山城)
巴爾幹半島 DAY 12 (布加勒斯特、布拉索夫)
巴爾幹半島 DAY 13+14 (布拉索夫、錫納亞)
沒有留言:
張貼留言