Holiday Inn早餐
食完早餐照舊返上房執吓野、上吓網，點知開唔到門。於是攞住張房卡落reception搵人搞，點知佢喺電腦整完我都開唔到門，又要再落過去。今次佢搵人同我一齊上房，用埋酒店張master房卡仍然開唔到門，佢仲問返我點解，我都想知喎。最後個職員又要落去攞一條最原始嘅鎖匙上黎先開到門。咁就搞咗十幾分鐘，好彩我不嬲都預多時間，如果唔係實遲出發。我仲有時間去酒店附近影吓相添，哩隻船係餐廳黎。
一朝早出發去保加利亞嘅里拉修道院(Rila Monastery)，車程加過境，用咗5個幾鐘。里拉修道院係喺山谷中嘅，我地喺修道院附近食左午餐先。
估唔到喺深山中竟然係食魚。哩隻鱒魚成個trip都食過幾次，唔難食，不過真係好多骨。
保加利亞玫瑰好出名，入咗保加利亞境內第一站就係餐廳，餐廳入面已經有玫瑰產品賣。連甜品pancake入面嘅蜜糖都有淡淡玫瑰味。
食完飯就入里拉修道院。修道院建於公元10世紀，當時一個修士Ivan Rilski(後來被封做聖人)喺附近嘅山窿修行。據聞佢有神奇力量，能醫百病，連國王都黎求見。後來愈黎愈多人黎聽佢講道，所以d信徒、學生就起咗哩座修道院。12-14世紀時，歷代國王都大力支持擴建修道院，令里拉修道院成為巴爾幹半島最大嘅東正教修道院。有三百幾個房間，最高峰可以容納上萬修士，不過而家得返10個8個。里拉修道院喺1983年被聯合國教科文組織列入世界文化遺產。
入修道院衣著要端莊，即係唔可以著吊帶、熱褲。我地見到有個著背心嘅亞洲女仔被拒於門外，佢好似唔知點算好.........遍山黃紅葉嘅時候佢仲著背心😨，著返件外套咪入得囉。
哩個希雷洛塔係修道院內最舊嘅建築物，其他建築物係1833年大火後重建嘅。
教堂外嘅柱廊畫滿濕壁畫
修道院嘅住修樓就係圍住哩個聖母誕生大教堂而建。
高處影出黎係咁嘅，我就影人地張postcard😛
睇完修道院再搭兩個鐘頭車就黎到保加利亞嘅首都索菲亞(Sofia)。一落車就見到班亞巴什清真寺(Banya Bashi Mosque)。
對面有麥記
清真寺隔離有個考古遺址，哩個公元前4世紀嘅古羅馬時期遺址，係1998年建地鐵時發現嘅，2010年先開放俾公眾參觀。
行到街尾就見到哩個聖佩特卡地下教堂(Sveta Petka Church)，係中世紀嘅東正教堂，佢有一部份喺地底下。
教堂對面就係聖索菲亞紀念碑(Saint Sofia Monument)。聖索菲亞係象徵智慧，原本哩度係放列寧像，2000年共產政權倒台後就換成索菲亞女神像。
地下隧道都見到古羅馬遺址
總統府
咁啱有換班儀式
總統府外有好多記者同保鑣，好似話總統一陣出黎會有野講，我地亂入添。保鑣好型，不過我唔敢影。
總統府後面有聖佐治東正教堂(Rotunda of St. George)，歷史可以追溯到公元4世紀。我真係覺得索菲亞好特別，好似隨便行吓街都見到古蹟，令我諗起羅馬。而且哩度d古蹟隔離就係現代建築，兩者嘅歷史可以相差千幾年。其實覺得有d格格不入，不過就係咁先夠特別。
哩個好似係歌劇院，四圍都係靚建築，有d我真係唔記得邊個打邊個🙈。
聖尼古拉俄羅斯教堂(St. Nichola Russian Church)，建於1914年。
沙皇解放紀念碑(Pametnik na Tsar Osvoboditel)，雕像係沙皇阿歷山大二世，紀念佢將保加利亞由鄂圖曼帝國解放出黎。
紀念碑對面可以望到亞歷山大涅夫斯基大教堂(Alexander Nevsky Cathedral)
經過個公園去亞歷山大涅夫斯基大教堂
亞歷山大涅夫斯基大教堂1882年開始興建，起咗30年先完工。佢係世界上最大嘅東正教堂之一，亦係巴爾幹半島上最大嘅教堂，可以容納1萬人。
教堂正門
亞歷山大涅夫斯基大教堂前面有個東正教堂
對面係聖索菲亞教堂，哩座教堂可以追溯到公元6世紀。
睇完晒教堂就返酒店，今晚住索菲亞嘅Metropolitan Hotel。首先食左自助晚餐先，款式唔多，不過好好食。
甜品都好好食，不過件件都好大件。導遊叫我試朱古力蛋糕，佢話好食，但我話太大件食唔晒，佢就分咗一半俾我。真係超正，如果佢唔同我share，我應該唔會食。
食完晚飯同幾個團友去咗附近一個好大嘅shopping mall，不過冇咩好買嘅。喺街上影返酒店。
去到保加利亞仍然不忘我嘅利物浦，利記重返歐聯，我一定要睇。一路吹頭一路睇。
巴爾幹半島 DAY 1+2 (盧比安娜、碧湖)
巴爾幹半島 DAY 3 (札格勒布、普箂維斯)
巴爾幹半島 DAY 4 (普箂維斯--十六湖國家公園、薩拉熱窩)
巴爾幹半島 DAY 5 (薩拉熱窩、莫斯塔爾)
巴爾幹半島 DAY 6 (杜邦力)
巴爾幹半島 DAY 7（高塔爾、巴杜華）
巴爾幹半島 DAY 8 (克魯亞、提拉那)
巴爾幹半島 DAY 9 (奧赫里德、斯科比亞)
巴爾幹半島 DAY 11 (維勒托洛禾山城)
巴爾幹半島 DAY 12 (布加勒斯特、布拉索夫)
巴爾幹半島 DAY 13+14 (布拉索夫、錫納亞)
沒有留言:
張貼留言