My Blog: 巴爾幹半島 DAY 12 (布加勒斯特、布拉索夫)

Yantra 酒店嘅早餐唔太啱我食

喺酒店餐廳影吓早晨嘅城堡，不過唔係好影到。

一早就要搭車去羅馬尼亞(Romania)首都布加勒斯特(Bucharest)。搭車加過關用咗接近5個鐘，喺途中嘅一個休息站撞到兩團大陸團，領隊一見到佢地，就叫我地去完洗手間好快d上車，因為大家鬥快過關。我地一定贏啦，因為當我地上車時，見到幾個強國大媽攞埋工具掘緊休息站旁邊嘅草。佢地真係將人連根拔起喎，好搞笑，掘黎做咩呀??帶返大陸??出到境咩???又入到大陸境咩???

去到羅馬尼亞又係食左午餐先。哩幾日，日日都好似食完早餐、搭車，跟住就食午餐，行程得半日。不過冇辦法啦，去嘅國家多，日日都穿州過省，好多車程。

餐廳環境幾好，食物都唔錯，係個主菜牛肉咸咗少少，其他都好好食。

食飯期間，當地導遊話可以幫我地換錢，因為羅馬尼亞好多地方都唔收歐元，而找換店又比較遠，所以佢幫我地去換。咁我少少地用10歐元換咗45羅馬尼亞列伊。佢地都係用膠紙幣。

哩間餐廳都好多外國人黎食

餐廳附近

食完飯就搭車去民族博物館。車程應該唔係好長，不過布加勒斯特真係好塞車，再加上有人示威，旅遊巴兜黎兜去都好似去返果d地方。

有人示威，警察戒備

終於去到民族博物館(Village Museum)

哩個博物館係將以前羅馬尼亞比較有特色嘅屋拆咗，搬黎哩度再砌返。好似我之前去俄羅斯諾夫哥洛德古城個藝術木材博物館。唔知點解我覺得你郁過佢，就好似冇咁原汁原味，甚至有少少假嘅感覺。

羅馬尼亞10列伊就係印咗哩間屋

有半間屋建喺地底，幾得意。

睇完民族博物館又要再塞住車去人民宮(Palatul Parlamentului)，即係「壽西斯古宮」。係羅馬尼亞前獨裁者壽西斯古為自己同老婆建造嘅宮殿，1984年開始起，起到佢被槍斃時仲未起好。當時拆咗28座教堂同3萬戶民宅去興建，用咗1億美元，等於而家40億歐元。佢係世界第二大建築，僅次於美國五角大廈。睇資料話入面好金碧輝煌、好豪華、好大，有三千幾間房。但我只係覺得好麻煩，未入去之前已經規矩多多。首先要收passport，我去咁多次旅行都未試過有景點要收passport。過x光機仲嚴過機場，已經乜都除晒出黎啦，但過機時仍然會響，又要俾人當你唔知咩咁check。連當地導遊同人民宮導遊(入宮一定要有人民宮嘅導遊)過機時都響，應該係唔響先唔正常。我心諗:你有咩咁巴閉呀?