晨早六點，已經食緊早餐
要搭3小時車先到伊斯坦堡，哩個休息站好大好靚。
返到伊斯坦堡
準備由亞洲走向歐洲
咁就到左歐洲喇
返到伊斯坦堡，就去參觀杜瑪伯爵皇宮(Dolmabahce Palace)。杜瑪伯爵皇宮位於博斯普魯斯海峽左岸，係19世紀中期嘅蘇丹王下令興建。其實當時鄂圖曼帝國已經開始衰落，仲浪費咁多錢去建哩個華麗嘅皇宮，難怪最後會滅亡。
入皇宮前要穿鞋套，入面亦不准影相。其實我都幾鍾意哩個皇宮，皇宮好大，好華麗。宴會廳內仲有英女皇維多利亞送嘅水晶吊燈，有750個燈座。配合埋36米高嘅圓頂，都好壯觀。搞到我好想住喺度一晚咁多啦。講到住，以前住過喺度嘅皇帝都冇好下場。而國父凱末爾都係死於此宮，所以皇宮內所有鐘都停在九點零五分，係國父死嘅時間。
皇宮個花園都好靚，對住博斯普魯斯海峽。
皇宮外嘅鐘樓
之後去食午餐。餐廳環境好好，望到個海，食物都非常好。
餐廳外
餐廳就在左邊條橋嘅下層
橋上有馬路，都有行人路
橋嘅兩邊有好多人釣魚
食完飯就去行大市集(Grand Bazaar)。哩個係號稱世界上最大嘅室內市集，有接近六百年歷史。市集有廿幾個出口，五千幾間商店，真係唔多夠時間行。黎得土耳其買野，一定要講價，由半價開始講起。有d店寫住係fixed price，但其實都仲可以有discount俾你。
當地人好鍾意order外賣蘋果茶
行完市集經過一間賣土耳其烤肉嘅，導遊都有講過，所以好多團友行完市集就黎試下。雞肉4里拉(HKD$16)，牛肉6里拉(HKD$24)。
入面有牛肉、薯條、菜同番茄。你可以叫佢落醬汁，不過我覺得我哩個冇醬嘅都幾好食，係衰在唔夠熱。
食完要出機場lu
由於光線問題，黑色嘅係蘑菇同菜，佢本身唔黑的。
我唔係購物狂，所以只買左咁多野。
土耳其都幾好玩，我最鍾意伊斯坦堡同棉花堡。去之前驚冇啖好食，因為當地人信伊斯蘭教，唔食豬。但其實d食物都幾好食，好多餐都自助餐，唔會餓親。
不過我覺得個領隊同導遊溝通上有d問題，不過好彩冇影響到行程，只係鹽湖冇得落車影相有d可惜。而領隊對土耳其真係唔係咁熟，佢自己都話比較少帶土耳其團，所以有時佢講關於土耳其嘅野，我都唔知信唔信佢好。不過佢服務上、態度上係ok的。
哩團最差係人數多，成43人。排隊去廁所、上車落車都用多左時間。最麻煩就係架車嘅座位啱啱好，想搵個位放下件厚褸都冇。不過由於團費算平，整體上我都滿意的。
