俄羅斯 DAY8+9(聖彼得堡--嘉芙蓮夏宮)

哩堆係團友食淨嘅早餐，我留意左佢地幾日，日日都食淨咁多，真係唔明佢地點諗。哩間酒店住3日，都已經知道有咩早餐食啦，仲可以食淨咁多野。

 今日主要得一個行程，就係去嘉芙蓮夏宮。一落車，佢地就自動識奏中國國歌。

 嘉芙蓮夏宮其實係彼得大帝為佢個皇后嘉芙蓮一世而建。不過當時只係一個小小嘅宮殿。到彼得大帝個女伊莉莎伯一世時，就將嘉芙蓮夏宮擴大兩倍，所以好多書都話嘉芙蓮夏宮係伊莉莎伯一世為媽媽而建。


 舞廳好大好靚


 天花板嘅畫好有立體感，當你一路行、一路望，就會覺得D柱好似立起來。





 伊莉莎伯一世好鍾意金色，但嘉芙蓮二世(凱薩琳大帝)唔鍾意金色，而佢個孫阿歷山大一世好錫祖母，所以將哩個部份改建。係成個夏宮唯一唔金碧輝煌嘅地方。



 哩個就係將嘉芙蓮夏宮擴大兩倍嘅伊莉莎伯一世

 哩個就係嘉芙蓮一世，即係彼得大帝嘅老婆、伊莉莎伯一世嘅媽媽。

 係寫字枱唔係鋼琴


哩個鐘鑲左鑽石，不過我影唔到。

 哩個係嘉芙蓮二世(凱薩琳大帝)個孫阿歷山大一世，亦係打敗拿破崙嘅皇帝。

阿歷山大一世嘅床，佢瞓慣左細床。

原本成個花瓶都係瓷，後來鍍D金上去。



嘉芙蓮夏宮外都好多攤擋賣紀念品
回頭再影下嘉芙蓮夏宮

最後去睇埋個抗敵紀念碑就出機場

到機場要自費食午餐，我同團友食左麥記。除左哩d，仲買左一支大橙汁同一個包，三個人先食左港幣六十幾蚊。
我地要先由聖彼得堡飛去莫斯科，先再由莫斯科飛返香港。黎到哩度，我個頭開始痛，唔知係唔係搭飛機恐懼症，明明頭先仲好地地。

去到莫斯科仲要由唔知terminal幾行到去terminal F，總之就行左好耐啦。越行個頭就越痛，個喉嚨又乾喎，簡直想死。出境又要等好耐，幾驚趕唔到班機。好彩後尾都順利上機，一上機就即刻食藥瞓喇。派餐時真係好唔想食，頭又痛，餐又難食，仲有d作嘔嘅感覺，唔知算唔算暈機浪。總之我短期內唔會再搭長途機啦，而家諗起都驚。

買左咁多野，食左兩餐麥記，仲借左d盧布俾人，先用左100美金。俄羅斯d野真係好平，買極都仲有錢淨。但如果將盧布換返美金會好唔抵，所以最後出機場夾硬用晒d錢佢。我不嬲都唔shopping，所以對我黎講算買得多野。

聖彼得堡好出名嘅朱古力

俄羅斯周街都見到嘅朱古力

書係買俾自己嘅


成個俄羅斯trip都幾滿意，我鍾意睇d宮殿、教堂，所以唔覺得悶。果幾日天氣又好，只係最尾兩日有少少雨。3月尾去天氣唔太凍，都有5,6度。領隊話如果夏天黎會有40度。不過俄羅斯都好乾燥，好多團友都喉嚨痛。我去9日，喉嚨痛左6日，但一返到香港就冇事。但始終3,4月仲未暖返晒，所以由室內到室外都有溫差，有5,6個團友都發燒，我都好驚被傳染，一聽到佢地話發燒，我自己又有少少喉嚨痛都食定藥先，好彩最後冇事。

俄羅斯行程都好舒服，日日都成9點先出發，又唔使晚晚搬酒店，又冇乜長車程。我覺得真係好好，不過美中不足係d噴泉仲未開囉。

有朋友話我已經好幸福，可以成日去旅行。我睇返自己個blog，雖然去過嘅地方唔算多，但都唔算好少啦。我應該係要知足嘅。突然又諗起楊千嬅首《再見二丁目》:

「原來過得很快樂   只我一人未發覺

如能忘掉渴望   歲月長衣裳薄

無論於甚麼角落   不假設你或會在旁

我也可暢遊異國   放心吃喝」

俄羅斯 DAY1 (莫斯科)

俄羅斯 DAY2 (莫斯科--克里姆林宮、紅場、列寧山、軍事博物館)

俄羅斯 DAY3 (莎哥斯基古城、莫斯科--經濟成就展覽館、莫斯科地鐵站、夜遊紅場)

俄羅斯 DAY4 (莫斯科、諾夫哥洛德古城)

俄羅斯 DAY5(諾夫哥洛德古城--尤里耶夫修道院、藝術木材博物館、克里姆林宮)

俄羅斯 DAY6(聖彼得堡--彼得夏宮、聖埃薩大教堂、隱士盧博物館)

俄羅斯 DAY7(聖彼得堡--彼得與保羅城堡、喀山大教堂、尼華大街、滴血教堂、尼古拉宮晚

餐)