俄羅斯 DAY5(諾夫哥洛德古城--尤里耶夫修道院、藝術木材博物館、克里姆林宮)

喺諾夫哥洛德古城就係住哩間PARK INN，我諗哩間酒店真係已經係叫做比較好，我地一日三餐都係返酒店食。

早餐

 餐廳外

 食完就遊古城，諾夫哥洛德古城係俄羅斯嘅發源地，都被列入世界文化遺產。



 首先我地黎睇哩個尤里耶夫修道院，修道院於1030年建成，差唔多一千年歷史。頂部係帽形，唔係洋蔥頭。




 之後就去藝術木材博物館，俄羅斯以前嘅屋都係木製。將以前嘅木製屋、教堂拆左，搬黎哩度再裝嵌。

 哩間屋嘅主人算係有錢了，小朋友瞓在上面的木板上。

有聖像嘅角落叫紅角，係全屋最靚嘅地方，有客人到訪會邀請佢地坐果度。



 附近有個跳蚤市場

 之後就入克里姆林宮睇下。克里姆林宮其實係圍牆、城堡嘅意思，所以唔係只係莫斯科有。

 哩個雕像有100噸重，係紀念諾夫哥洛德建城一千年而造，差唔多有150年歷史，應該係城內歷史最短嘅。上面有好多偉人雕像，正面中間係彼得大帝，佢隔離有個天使伸手指向前方。代表彼得大帝搵到波羅的海嘅出海口，建立左聖彼得堡。左邊有個手執地球嘅人，佢係伊凡三世，可以話係統一俄羅斯嘅人。不過銅像中冇伊凡四世，雖然伊凡四世強化軍隊，擴大左版圖，不過諾夫哥洛德人唔鍾意佢，認為佢黎諾夫哥洛德偷走晒哩度嘅財富。令諾夫哥洛德由一個貿易中心變成一個平凡嘅城市。

 諾夫哥洛德古城內嘅聖蘇菲亞大教堂，建於1045-1050年間，係俄羅斯最古老嘅石製教堂。不過因為古老，入面冇暖氣，入面超凍，仲凍過外面。






 出城影返個城牆







諾夫哥洛德古城









睇完古城返PARK INN食午餐 

 明明哩餐難得有牛食，點知突然有幾個團友話唔食牛，搞到全團都要食雞。真心覺得D團友麻Q煩，領隊都忍唔住問點解報名時唔講。

唔知點解雞嘅樣整到咁似魚，如果係魚就好啦，好憎食鞋雞。


 食完飯又搭返3個鐘車返聖彼得堡。其實黎諾夫哥洛德真真正正參觀只係4個鐘，但來回車程要6個鐘再加瞓一晚。有團友覺得唔值得黎，仲話以後叫朋友黎俄羅斯8日好喇，唔好去埋諾夫哥洛德。不過我又覺得一場黎到，都唔爭在睇埋俄羅斯嘅發源地啦。

返到聖彼得堡，住3晚CROWN PLAZA AIRPORT，係成個旅程最好嘅一間酒店。





 酒店大堂


 酒店附近有24小時大超市，仲有麥記同KFC。

 試左麥記，哩度只係港幣三十幾。
終於有牛食




俄羅斯 DAY1 (莫斯科)
俄羅斯 DAY2 (莫斯科--克里姆林宮、紅場、列寧山、軍事博物館)
俄羅斯 DAY3 (莎哥斯基古城、莫斯科--經濟成就展覽館、莫斯科地鐵站、夜遊紅場)
俄羅斯 DAY4 (莫斯科、諾夫哥洛德古城)
俄羅斯 DAY6(聖彼得堡--彼得夏宮、聖埃薩大教堂、隱士盧博物館)
俄羅斯 DAY7(聖彼得堡--彼得與保羅城堡、喀山大教堂、尼華大街、滴血教堂、尼古拉宮晚餐)
俄羅斯 DAY8+9(聖彼得堡--嘉芙蓮夏宮)