酒店對面有間超市，不過尋晚太夜黎到，冇時間過去睇吓。
今日第一站去布拉索夫(Brasov)市中心嘅斯法托露伊廣場(Piata Sfatului)。不過可能仲早，天色唔係咁好，灰灰朦朦咁。
山上有個BRASOV牌，不過我冇辦法影得清楚😭。
舊市政廳，後面偏右有個圓頂嘅教堂，就係羅馬尼亞東正教大教堂(Romanian Orthodox Cathedral)。
我唔知做乜好似撞邪一樣瘋狂影個牌，搞到冇時間睇其他建築。最慘係影極都唔靚、唔清喎，而家諗起都想喊😭😭😭。個廣場好靚，仲有好多地方值得影。
個團實在太趕，喺哩度冇自由活動時間，只係跟住當地導遊慢慢咁行，搞到你唔敢走太遠去影相。
喺廣場已經見到黑教堂
黑教堂(Black Church)建於14世紀，係東歐最大嘅哥德式建築。1689年一場大火將教堂燻黑，重建後外牆都係黑黑地，所以叫黑教堂。
影埋個人就知教堂有幾大喇
加大肋納門(Poarta Ecaterinei)，建於1559年，係防禦之用。
城門中間有個高塔，旁邊仲有4個小角樓，象徵哩個城鎮擁有司法自治權同埋有決定死刑嘅權力。(後面又望到山上個BRASOV牌喇😝)
加大肋納門向右行就係Poarta Schei，建於1827-1828年間。
Poarta Schei對住個迴旋處同遊客中心
一路行去旅遊巴停泊嘅地方，沿途見到有博物館。當地導遊都冇介紹，又可能係我掛住影相喺隊尾，佢介紹咗我都唔知。
唔知點解香港嘅枯葉唔覺得靚，但外國嘅枯葉就覺得靚。
跟住就去布蘭城堡
布蘭城堡(Bran Castle)又被人叫做吸血彊屍城堡，建於14世紀，最初嘅目的係軍事用途。1920年布拉索夫議會通過，將布蘭城堡送俾羅馬尼亞瑪麗皇后(Princess Marie of Edinburgh)，瑪麗皇后係維多利亞女王嘅孫女，所以布蘭城堡嘅佈置都好英國feel。
其實布蘭城堡同吸血鬼完全冇關係，佢被人叫做吸血鬼城堡或者德古拉城堡，係因為1897年愛爾蘭小說家布萊姆‧斯托克(Bram Stoker)寫咗世界聞名嘅小說《德古拉》(Dracula)。小說嘅主角吸血鬼德古拉伯爵係以弗拉德三世做藍本。弗拉德三世(Vlad al III-lea Ţepeş)曾經統治過布蘭城堡附近嘅地區，佢打仗係勇猛無敵，曾經抵抗鄂圖曼嘅入侵，但同時佢又好殘暴不仁，所以布萊姆先搵佢做吸血鬼嘅原型。小說嘅背景就係布蘭城堡，但歷史上嘅弗拉德三世其實冇住過喺布蘭城堡，佢最多只係黎過哩度視察，做防禦嘅工作。
雖然布蘭城堡同吸血鬼無關，但由於《德古拉》太深入民心，多次被拍成電影。我黎到都不期然諗起《驚情四百年》，入面仲有我最鍾意嘅奇洛李維斯😍。
又要行斜路，不過好彩只係好短路程。
入城堡
臨近Halloween，布蘭城堡都要應吓節。
瑪麗皇后
條樓梯好窄，我覺得哩度係成個布蘭城堡唯一有少少吸血鬼feel嘅地方。
城堡屋頂望出去個view好正
入面好多通道都好窄
頂層有個室講關於吸血鬼
哩個就係弗拉德三世
城堡附近嘅環境好靚
睇完城堡就去咗附近嘅市集
主要賣布蘭城堡同吸血鬼嘅紀念品
市集望到布蘭城堡
哩餐.......唔多夠飽，塊牛扒咁細😓
食完飯搭大約一個鐘頭車就黎到錫納亞(Sinaia)，黎哩度係睇佩勒斯城堡(Peles Castle)。一黎到佩勒斯城堡附近，已經覺得哩度d建築咁似德國嘅?
原來佩勒斯城堡係羅馬尼亞第一位國王卡羅爾一世(Carol I)於1873年興建嘅。卡羅爾一世本身係德國嘅王子，所以佢嘅城堡好德國feel。我地只係睇外觀，冇入場，已經覺得個城堡好靚。
卡羅爾一世像
遠影超靚
點解好似手機影仲靚。配埋後面d紅葉真係好靚，連黎過7,8次嘅領隊都話好靚，佢都攞部手機出黎影。
離開城堡，經過個市集，去錫納亞修道院。
錫納亞修道院(Sinaia Monastery)建於1695年，哩個係修道院內嘅東正教堂。
鐘樓
其實我地入黎只係去廁所😓，導遊同領隊完全冇講過哩度係乜，我係事後上網搵返資料。
今晚嘅晚餐係飛機餐，不過起碼10點先有得食，所以我喺布加勒斯特機場食咗晚餐先。即叫即做漢堡。
哩間機場快餐店唔收歐羅，不過可以碌卡，哩度食咗港幣$67。
都幾好食，超飽。
布加勒斯特機場都好多吸血鬼產品，禁區內就收歐羅。左邊個公仔要65歐，忍唔住講咗句痴線，影咗當買咗算啦。
候機室
我地首先由布加勒斯特飛伊斯坦堡，再轉機返香港。布加勒斯特到伊斯坦堡機程只係個幾鐘，飛機餐比較簡單。不過頭先我食咗咁大個漢堡，根本食唔落哩個包，食咗幾啖就諗住睇吓機上有咩娛樂。但我個位果個screen好唔敏感，touch極都冇乜反應。正當我想放棄、諗住瞓教時，隔離個鬼佬好熱心地教我用個手掣去控制個電視。佢咁熱心，我唯有是但搵野睇，睇到落機啦。
伊斯坦堡返香港，起飛時間係0125，上一機就瞓到落機。
今次真係冇咩好買，只係買咗哩d野。其實數量唔只咁多，不過種類就係咁多。
我好滿意今次哩個巴爾幹之旅，都覺得自己好好彩。因為本身我係報咗團同朋友8月黎，後來唔成團，當時覺得好失望。但真係塞翁失馬，焉知非福，如果我8月真係黎咗，一定熱死。領隊話如果夏天黎，佢會叫團友帶定風扇仔，因為會滴住汗食飯。而家10月黎巴爾幹，天氣好好，好舒服，唔凍唔熱，又開始有紅葉睇，而且冇乜落雨。最重要係而家我可以去埋羅馬尼亞，原本我報8月第二個團，因為朋友唔想去太耐，所以唔去羅馬尼亞。其實羅馬尼亞好值得去，我覺得唔夠添，希望有生之年可以再去羅馬尼亞。
巴爾幹半島 DAY 1+2 (盧比安娜、碧湖)
巴爾幹半島 DAY 3 (札格勒布、普箂維斯)
巴爾幹半島 DAY 4 (普箂維斯--十六湖國家公園、薩拉熱窩)
巴爾幹半島 DAY 5 (薩拉熱窩、莫斯塔爾)
巴爾幹半島 DAY 6 (杜邦力)
巴爾幹半島 DAY 7（高塔爾、巴杜華）
巴爾幹半島 DAY 8 (克魯亞、提拉那)
巴爾幹半島 DAY 9 (奧赫里德、斯科比亞)
巴爾幹半島 DAY 10 (里拉修道院、索菲亞)
巴爾幹半島 DAY 11 (維勒托洛禾山城)
巴爾幹半島 DAY 12 (布加勒斯特、布拉索夫)
