英德 DAY 2

第二日早餐喺酒店食圍餐，好耐未食過圍餐早餐，不過味道都OK的。



 食完早餐又影下酒店大堂

 返上房又影下露台，尋晚天黑影唔到。
第一站就係去小趙州橋


其實小趙州橋冇乜特別，只係曾經有人經過，覺得幾靚，影相post上網。之後好多人都覺得靚，就變左旅遊景點喇。
 


 睇完橋就去彭家古堡。話係廣東小布達拉宮喎。呀~大陸人d想像力都幾豐富。



起初諗住冇乜特別，天氣又熱到就黎熔。想行一陣就返轉頭啦。


 點知上到去望返落黎原來好靚，好彩頭先冇放棄到。
 我揀黎英德，係想睇英西峰林哩d喀斯特地貌。




 睇返行程，應該仲有個景點「英西千軍峰林十里畫廊」。點知問左領隊，佢話十里畫廊唔係一個景點，只係一個地區。我地就身處哩個地區，頭先搭車時都見到哩d山峰。吓!!!頭先搭車????太陽好曬，我冇開窗簾喎!!!!!!!算啦，好彩上到彭家古堡都叫做睇過下峰林啦。

今日三點幾就返到酒店，首先有個小小下午茶。飲品可以揀橙汁或檸樂，仲有涼粉同餅。

 今晚住清新花園酒店。初初覺得個名咁hea，後來先知原來清新係哩一區嘅名，係清遠清新區嘅花園酒店。



原來磨砂玻璃就係沖涼嘅位置


 酒店房有露台


 咁早返到酒店冇野做，就去附近行下。發覺好多小朋友喺度玩水。

 百步梯公園，導遊介紹我地去，喺酒店行過去十幾分鐘，但去完覺得把鬼。天氣又熱，留喺酒店房涼下冷氣、上下網仲好。話時話，平時去旅行，都好緊張酒店有冇wifi。不過我上開嘅網，喺大陸全部上唔到，就算俾wifi我都冇用。



 晚餐就喺酒店食自助餐，都算唔錯。

英德 DAY 1

4個月前我已報名巴爾幹半島一個12天團，點知唔成團，之後又夾唔到轉其他日子出發。最後我個巴爾幹12天變廣東省3天。落差實在太大了吧!!!

算啦，去英德都好過冇啦。一早8點，就去到羅湖集合，之後去埋皇崗接其他團友。跟住搭左個幾鐘頭車去食午飯，之後再搭2，3個鐘車先去到第一個景點--仙橋地下河。

仙橋地下河有「華南第一美洞」之稱。一入去首先經過兩個水池，之後會坐船穿過第一個溶洞。跟住就係一段明河，上岸行一段小路就去到第二個溶洞--仙河龍宮。

第一個溶洞的入口，入洞前人人都要著曾經背負萬人汗水嘅救生衣。

 第一個溶洞比較細，但都幾靚。每隻船坐廿人，會有導遊喺船頭講解。


準備出去明河時就落大雨，條明河都幾長，唔可以冒雨出去，唯有等冇雨先出去。等下等下都等左廿幾分鐘，有d人話不如算啦，唔好去啦，返轉頭啦，但船夫話係過雲雨。果然冇幾耐之後雨細左好多，我地就繼續行程。

黎到哩個位置上岸行一小段路去龍宮。

哩班鴨頭先喺我地船頭，幾驚隻船會撞到佢地。

 行左一陣就到龍宮入口。


 yeah!霸到頭位。

哩個位置一年四季都有水流落黎，好似水簾。
其實成個溶洞久唔久就有水滴落黎，有時仲有蝙蝠四圍飛。不過入面好涼好舒服。

有d位置要低頭先過到。

龍宮行到最後就要調頭，原路出返去出口。


遊完溶洞就去附近嘅「仙味館」食下午茶。
所謂下午茶就係艾糕同擂茶粥。

哩碗擂茶粥就好似有少少咸味嘅粥再加少少綠茶粉。

跟住就去積慶里茶園

地方都幾大，不過又冇想像中咁靚。好多牌喺度殺風景。
去完茶園就返酒店，第一晚住英德花園酒店。