九州 DAY 5 (鳥栖OUTLET)

SEA HAWK HILTON嘅早餐係哩幾日咁多間酒店中最豐富嘅，不過唔知做乜我完全唔肚餓，只係食左好少野，而家諗返覺得有D蝕左。

食完早餐見到外面落雪，即刻返房換返件厚衫。

之後就出發去鳥栖OUTLET，今日有三個鐘行OUTLET。


天氣時晴時雪



友人買左LEGO福袋，唔知點解唔關我事但我都覺得好興奮。福袋果然係散貨嘅good idea。哩個福袋賣7999yen，但袋內貨品嘅價值有15000yen。

去左FOOD COURT食lunch。

兩個人食左咁多野

食完又落雪，今次都落得幾大。平時九州好少落雪，今日最後一日旅程都俾我地撞到落雪。最開心係友人囉，佢第一次見到落雪，興奮無比，佢成個旅程影得最多相就係雪景-_-'。



去完outlet就出機場作最後衝刺，買下royce呀，白之戀人呀，薯條三兄弟嗰d囉。一睇就知我為食啦XD。


九州再見喇，我諗我唔會再黎架喇，你保重喇。

九州 DAY 1
九州 DAY 2 (別府海地獄、金麟湖、湯布院、九重夢大吊橋、阿蘇火山博物館)
九州 DAY 3 (豪斯登堡)
九州 DAY 4 (九十九島、出島、太宰府天滿宮)

九州 DAY 4 (九十九島、出島、太宰府天滿宮)

 今日第一個行程就係去九十九島，九十九島係散落喺長崎縣西部嘅島嶼，其實一共有二百多個島，大部份冇人居住。我地今次係坐船欣賞哩D島嶼。

乘船的碼頭



 我地坐白色嗰隻珍珠皇后號，船程大約一小時。

開船lu

航行期間，久唔久會用日語、普通話同英語介紹左邊係咩島，右邊係咩島。碼頭亦有小冊子介紹d島嶼。不過我覺得同我搭船去長洲、南Y島d景差唔多。









網上搵到嘅圖片，如果高空影落去會靚好多。
搭完船就去睇長崎原爆和平像，不過當時天氣好唔穩定，明明搭車時見到只係毛毛雨，但當我地由停車場搭lift上去睇個像時，一開lift門，d雨係咁撇落黎。我地即刻跑過隔離條樓梯落返停車場，只係望左個像幾秒，完全冇影過相。當我地離開和平像去食午餐時，又冇雨喇，真係激死。

午餐食炸雞同鮮蝦煲仔飯

食完飯就去出島。出島係一個扇形嘅人工島，係17世紀時日本實行鎖國政策期間，對外交流嘅唯一窗口。

出島模型

去完出島就去太宰府天滿宮。我覺得太幸運了，因為原本個行程係去田崎真珠，即係賣珍珠嘅地方。報名時我見行程表個備註寫住話如果田崎真珠休息就去太宰府天滿宮。由嗰日起，我就日日祈禱希望田崎真珠休息XD。

太宰府天滿宮附近嘅街道都好有特色。

太宰府嘅天滿宮係祭祀學問之神，明天元旦日就會好似黃大仙搶頭注香咁多人，所以哩個行程由明日搬左黎今日。

天滿宮外有好多美食攤檔

行返落停車場

哩間STARBUCKS設計好特別


行完天滿宮已經天黑，不過仲有個行程，就係去福岡運河購物城。由於今日係除夕，好多店都提早收爐，所以我地實際得一個鐘shopping。好彩我唔係購物狂，而且一早已經上網搵定我嘅target店舖嘅位置，所以勉強都夠時間買所需要嘅野。
shopping完就食晚飯，今晚食燒烤餐，配給嘅肉係得咁多(二人份量)。

不過salad bar就任食嘅

我地又同領隊訂左超大隻牡丹蝦同帶子，啖啖肉好正，尤其帶子，厚肉到要切一半黎食。兩樣夾埋6880yen。
領隊話蝦頭攞黎燒，蝦身同帶子就做刺身。不過我地都攞左一隻蝦同一隻帶子黎燒。其實燒左黎食味道都唔錯，但我都係鍾意刺身多D。



食完飯仲有十分鐘時間，我地即刻衝去隔離間超市買左友人夢寐以求嘅士多啤梨。佢未出發時已經講要買，但黎左第4日先搵到地方有得賣。哩度大約650yen，真係好香好甜。
今晚住SEA HAWK HILTON。酒店設計、環境係幾好，不過最衰就係房間冇免費WIFI。友人視WIFI如命，唯有俾499yen喺房用WIFI。


喺房間休息一陣，就落左lobby睇人地倒數。






HAPPY NEW YEAR!!!

九州 DAY 1
九州 DAY 2 (別府海地獄、金麟湖、湯布院、九重夢大吊橋、阿蘇火山博物館)
九州 DAY 3 (豪斯登堡)
九州 DAY 5 (鳥栖OUTLET)