廈門 Day 3

明珠海灣酒店的自助早餐都算豐富



 今日嘅景點只有一個，就係去濕地公園睇哩個黑天鵝湖。



 午餐

午餐餐廳



 食完午餐，去多個購物點就返香港lu。哩個係廈門北站

 原本打算買KFC上車食當晚餐，點知排排下隊突然見前面好多人都走左。原來D雞賣晒，我望一望個架，真係一隻雞、一個葡撻都冇。如果要等，要等半個鍾，我梗係唔等啦，但有好多人等。冇得食雞唯有在車上買飯食啦，是但食飽就算。

喺高鐵上有幾個細路走黎走去，又嘈到死。我地見到有個列車職員經過就同佢講，希望佢可以話下D細路，喺度跑又危險又影響到人。我地一投訴，其他大陸人都開聲話佢地真係好嘈。可惜個職員話要細路仔坐幾個鐘係冇可能，走黎走去係正常喎。我有一刻真係諗過不如伸隻腳出去kick低d 細路。

搭完高鐵去到深圳仲要搭地鐵去過關返香港，哩個真係一個辛苦團。大航假期冇安排車車我地往返福田口岸同深圳北站都明白，始終一分錢一分貨，佢都幫我地買左地鐵票。食方面主要係蔬菜我都接受，因為團費真係平d。住方面甚至已經高過我預期。但佢行程寫左會去嘅集美學村，最後變左超遠距離經過望一眼，哩樣真係好難令人接受，你寫得出就要去，一係你就唔好寫出黎，不知所謂!!!!其實第一晚嘅晚飯地點同行程寫嘅有出入已經覺得間旅行社好唔掂，咁都可以錯????五星酒店晚餐變二星賓館晚餐，雖然佢地好快已經補償我地一餐宵夜，但已經給人留下壞印象。回來香港後，我上網見到哩個團嘅行程仍然係寫住準五星酒店內享用土樓滋味宴，唔知佢係未改返行程定以後打算真係俾人在準五星酒店內享用土樓滋味宴。大航假期冇意見書俾人寫，亦唔見有投訴途徑，可見哩間旅行社完全唔重視客人意見。可能佢地諗住收得你平，就唔好要求多多啦。但我唔係冇俾錢的!!!!其實佢有幾百蚊自費，計計埋埋都唔係平過其他旅行社好多。團費平預左食住冇咁好，但唔可以話左去但唔去囉。我參加過旅行團大大話話都三四十次，有平有貴，有長線有短線，但五星餐變二星餐、外觀景點變成旅遊車遠距離經過我真係第一次見，仲要係同一個團發生。真係唔知大航假期幾時執。

廈門 Day 2

 

朝早起身發現原來酒店房露台外都有個土樓



酒店走火通道大門打開左，行過去睇，又見到另一個土樓。


酒店早餐選擇不多



 酒店大堂


 食完早餐就搭三小時車去廈門。這三小時行車期間經過集美學村，導遊有叫我地遠距離望下，我以為會去，所以冇在車上影相。後來問返領隊，原來車遊左就等於去左，我真係覺得佢係呃人。


睇返個行程，頭頂佢大大隻字寫去南溪土樓、環極樓、集美學村。南溪土樓、環極樓去左啦，影左好多相。集美學村同南溪土樓、環極樓一樣被highlight出黎，諗住都係一個重要景點。再睇返day 2個行程話會外觀華文學院、龍舟池同觀景台。但最後竟然係喺超遠距離的公路上望下就算。好彩我坐車的左邊，可以望到。如果坐右邊嘅團友根本完全望唔到集美學村囉，咁都當去左個景點。真係好嬲，我永遠都唔會再參加大航假期!!!!!!

到廈門嘅第一個行程就係去購物點飲茶。
 
 
 團友仲品緊茶，我地就去左對面食蚵仔煎。
 等團友買完茶就去食lunch，之後就去鼓浪嶼。途中可以遠眺台灣嘅金門。海嘅對岸就係金門。

 見到鼓浪嶼喇。聽聞鼓浪嶼好靚，好想快d去睇下。
要搭哩d渡海小輪先去到鼓浪嶼，船程只係大約十分鐘，但來回票價要RMB35，都幾貴。仲要極少座位，你一定唔會夠大陸人爭。


到達 鼓浪嶼

 
鼓浪嶼都幾大
 
 
行行下先發覺其實好似長洲、南Y島。
 
 
 
 

 有個防空洞














 行左大約半個鐘，黎到哩間茶坊坐下，飲下茶，試食下。
 鯊魚骨，脆脆地都幾好食。

導遊幫我地買左一人一粒「葉氏麻糍」，話係鼓浪嶼島上最出名喎，不過我覺得味道一般，賣相直頭唔掂。一眼望落去真係好似屎。
 
 之後我地大約有個多小時自由活動時間，其實鼓浪嶼有好多名勝景點，不過我地完全唔夠時間行。而且人又多，行步路都慢d，所有我地只係喺茶坊附近行下食下野。不過真係好多野食。





 醬爆螺肉變左咁，原來個殼唔會跟上，不過幾好食。
 菠蘿糯米飯


 廿蚊串，一串咁食住好有氣勢，不過好難分。所以我地叫佢切粒上，都幾好食。

 食完野就要離開鼓浪嶼喇。等排隊搭船超多人，而且不斷會有人插隊。好喇，到佢開始嘟飛入閘時，好多人從四方八面湧埋黎，根本我地之前乖乖排隊就係嘥氣嘅，排左等於冇排。而且有一刻我真係覺得會發生人踩人事件。之後聽到有大陸人話以後都唔黎廈門，我都係咁話。

逼完船我地就去中山路食野，今餐自費。原本打算搵d地道野食，但因為去完鼓浪嶼太攰，我只想搵個可以坐得舒服d嘅地方食飯，所以揀左哩間食四川野。


中山路
 
 
 食完飯行行下見到有地道小食，又再食過。又食左蚵仔煎同沙茶麵。


 食完飯仲有個景點，就係去明珠塔睇夜景，不過我冇帶腳架，冇張相唔檬。





 明珠塔夜晚冇開燈，完全影唔到個塔嘅外觀，唯有影下張poster。

 之後終於可以返酒店，今晚住明珠海灣國際大酒店。