湖南 Day 1

其實我同個旅伴一早報左名打算去東歐，點知佢突然公司有嘢做，唔可以如期出發，於是唯有退團(報名時同旅行社講掂數，如果我地真係唔得，可以退返錢俾我地)，揀d短短地嘅團囉。由東歐變張家界，其實好唔開心架~~~

 

聖誕節香港機場都有d佈置

到即將起飛時，突然話要delay，因為長沙嗰邊天氣唔好，機場關閉。咁冇計啦，咪四圍行吓。點知冇幾耐之後又話可以起飛喇，咁就拿拿林上機啦。

 

當我地飛左個幾鐘，滿心歡喜以為就到時，機長有廣播，話長沙天氣唔好，要原機折返!!!!!!!吓???已經飛到喇喎，機場都開架喎!!!可能港龍d機長穩陣d啦，唔敢降落，都好嘅，安全至上，唔好夾硬嚟，咁咪返香港囉~~~~

 

返到香港就要一等再等，由上晝9點機一路話delay，de到夜晚9點，機長決定取消今日班機，話一人俾返$300我地返屋企，聽朝9點再飛過。同一班機有我地新華，仲有永安同中旅團，3個團嘅團友好團結地一齊鬧港龍d地勤，拍晒枱咁話俾$300耍走我地，當我地係咩呀??我地唔接受呀!!!我見港龍個職員d汗真係一滴滴咁滴出嚟，好似做戲一樣，之後佢打電話同公司講話冇人接受哩個安排。佢同公司傾左一輪，之後話我地全機人都可以喺機場酒店住一晚。哈哈~~~原來幸福真係要自己爭取架喎，如果冇人出聲，真係要走人。$300???搭的士都唔夠啦!!!!!今次足足delay左24小時，機場入面d嘢都食到唔想再食喇，好彩有得claim保險，不過都冇左一日。