今日有半日自由活動時間，本來諗住自己去桂爾公園，但由於尋晚去到米拉宮(米拉之家,Casa Mila )時已關門，所以今日唯有犧牲桂爾公園，再去米拉宮啦。唉~~~去唔到高迪公園，覺得好遺憾，我都未見過人地去巴塞隆拿唔去桂爾公園...............
早餐算豐富
早餐算豐富
鬥牛場
食完早餐就返去林布拉大道
又影個飲水器，話飲一口就可以重遊巴塞隆拿喎~~
又有聖誕老人爬入屋
林布拉大道上嘅街市，唔記得咩名添，不過係幾出名架喎，旅遊書都有介紹。
嚟哩度就係為左買火腿。街市入口右邊第一檔就係，100克3年黑毛豬後腿，即切價20歐羅。4年就30歐。如果買d一早pack好嘅就10歐，都算平。買前仲有得試食。
街市行返出黎就係地鐵站
試下搭地鐵去米拉宮，其實行去都得，慢慢行大約20-25分鐘，不過我地又想試下搭地鐵。其實都唔平，3個站都2歐羅。我地唔識買飛，咁啱有人買緊，於是問人算喇，費事浪費時間研究。
由哩個Liceu站出發
第三個站Diagonal落車，出口行兩步就到米拉宮。
高迪好鍾意用曲線，成個米拉宮都由曲線組成，所以就算佢位於轉彎角，睇落都唔係好覺係角位。
米拉宮冬季開9a.m.-6p.m.，入場費16.5歐羅。
一入去就搭lift睇左屋頂先。屋頂有好多羅馬武士造型嘅通風口同煙囪。
喺屋頂望返落街
我地走時就好多人排隊入場，好彩我地去得早。高迪喺巴塞隆拿咁出名，我都唔明點解d團友唔識。佢地只係shopping，全團得我地兩個去米拉宮，又得幾個人話去高迪公園搞到人數唔夠，領隊唔安排我地去................跟團雖然唔使煩交通、住宿，但真係好唔自由。我諗我以後都係參加d貴團，去多d地方。我哩個cheap團好多自費景點，唔夠人去就冇得去，行程好冇保障。真係諗起都嬲~~
睇完米拉宮，對高迪好有興趣，所以買左哩本書。哩本好呀，又平，平之餘又簡單介紹晒高迪整個人生，仲用好多圖畫表達，圖畫又靚又仔細，又唔多字，字又淺白易明。啱我，我唔鍾意睇咁多字。
之後行返去加泰隆尼亞廣場。又經過巴特婁之家(Casa Batllo)。影下先，外型都好靚。米拉宮嘅主人就係因為鍾意高迪設計嘅巴特婁之家，所以先搵高迪幫佢設計米拉宮。
隔離哩間係亞馬多爾之家(Casa Amatller)。 哩個就唔係高迪作品喇，不過就係因為佢靚，刺激到巴特婁都要整靚自己屋企，先會出現今日見到嘅巴特婁之家。
巴塞隆拿街頭
加泰隆尼亞廣場
原本喺香港已經搵定地方食墨魚飯，點知餐廳13:00先開，但我地13:15已經要出機場，唯有食burger king。
咁就要7.4歐羅..........
不過間burger king幾靚，有好多畫
好普通的一個包
食完出機場lu
機場的紀念品
巴塞隆拿機場賣d紀念品都好有巴塞隆拿特色。有聖家堂上面嗰4條粟米芯
仲有鬥牛，好鬼cute呀。
機場的飯是連鑊賣的
希斯路機場
